Java Script ist deaktiviert!

Damit die Seite mit vollem Funktionsumfang korrekt dargestellt werden kann, muss Java Script aktiviert sein.

Přehlad nowinskich zdźělenkow Załožby

 

Koncept za digitalnu ofensiwu do nadawka dali

Projekt "Serbska rěč w nowych medijach" ma so dalewjesć a projektowy status přewinyć. Tole je wotum čłonow rady Załožby za serbski lud, kiž so wčera w Sakskim statnym ministerstwje justicy w Drježdźanach k swojemu nalětnemu wuradźowanju zeńdźechu. Direktor ma nadawk, hač do nazymy cyłkowny koncept za digitalnu ofensiwu nadźěłać. Při tym njeměł so jenož wutwar runje zakónčenych pilotowych projektow wobkedźbować, ale tež skutkowny marketing kaž tež digitalizacija dźěłowych procesow w spěchowanych institucijach.

Dalše ćežišćo bě podpěra projektoweho dźěła serbskich towarstwow a dalšich projektowych nošerjow w Hornjej a Delnjej Łužicy. Nimo dweju přidatnje přistajeneju projektoweju managerow ma w přichodźe wot Załožby spěchowany personal, kiž ma projektowe dźěło na blidźe, jako wirtuelny pool projektowych managerow wusko hromadźe dźěłać a fleksibelnu profesionelnu podpěru zaručić. Prěnje zhromadne dźěłowe zetkanje je so hižo wotměło.

Žadyn rozsud njepadny nastupajo nowe stejinišćo za Serbski institut w Budyšinje. Hłowna přičina přemyslowanjow je, zo ma so magacin Serbskeho kulturneho archiwa signifikantnje rozšěrić a modernizować. Radźićelam prezentowachu so na zakładźe studije trěbne wudawki za nětřišu a alternatiwnu městnosć, za rozsud pak ma so financěrowanski koncept za wobě warianće nadźěłać. Załožbowa rada ma nazymu wo městnosći rozsudźić.