Braniborske statne knježerstwo je w dźensnišim kabinetowym posedźenju (18. meje 2021) přihłosowało Štwórtemu finančnemu zrěčenju k zhromadnemu financowanju Załožby za serbski lud přez Zwjazk, Kraj Braniborska a Swobodny stat Sakska w lětach 2021-2025. (hlej připołožene nowinske zdźělenje MWFK)

Z jasnym stopnjowanjom přiražkow njezaruči so jenož dotalne dźěło załožby, ale tež zwoprawdźenje nowych naprawow. K tomu praji Jan Budar, direktor Załožby za serbski lud: "Ze zwyšenjom přiražkow wot 2021 ma Załožba za serbski lud prěni raz w swojich stawiznach móžnosć, w nowych nuznje trěbnych wobłukach skutkować. Hłownje su to skrućenje rěčnych rumow, profesionalizowanje marketinga a zapři­jeće serbšćiny do modernych rěčnych technologijow. Mam zwyšenje přiražkow za znamjo hłubokeje dowěry do dźěła załožby. Zo mamy jako Serbja nětko planowansku wěstotu a móžemy zdobom nowe pola skutko­wanja natwarić, je wulka motiwacija do přichoda."

Předsyda Domowiny, Dawid Statnik, wupraja so takle: "Z dźensnišim rozsudom za Štwórte finančne zrěčenje wo Załožbje za serbski lud je krajne knježerstwo w Podstupimje swoje spušćomne partnerstwo ze serbskim ludom wobkrućiło. Braniborska je so zašłe lěta wospjet jako swětłownja načasneje politiki we wobchadźenju z narodnej mjeńšinu wopokazała: nowelěrowanje serbskeho zakonja, runohódnosć serbšćiny na pućnikach dróhow a taflach zjawnych twarow, financowanje hłownohamtskich społnomócnjenych wokrjesow atd. Tohodla so wjeselimy, zo je Braniborska nětk tež zwólniwa, swojej zamołwitosći za přichodne pjenježne wuhotowanje załožby wotpowědować. Z tym budźe móžno, bolostne skrótšenja zašłeju lětdźesatkow tróšku wurunać a serbsku jónkrótnosć Łužicy tež w cyłkownym zajimje regiona na braniborskim boku hišće sylnišo profilować."

Kathrin Šwjelina, předsydka Rady za serbske naležnosće w Braniborskej, praji k wozjewjenju: "Z dźensnišim přihłosowanjom je dźěło załožby za přichodne lěta dźakowano dalšej finančnej podpěrje ze stron Zwjazka, Braniborskeje a Sakskeje zaručene. Załožba za serbski lud móže nětk jeje tarifowe zawjazki spjelnić a ma zdobom móžnosć, na polu spěchowanja rěče wažne nowe akcenty sadźić. Hódnoćimy to jako jasny politiski signal wšěm we Łužicy bydlacym Serbam. Rada je sej w tutym zwisku za jeje přichodne posedźenje 1. junija 2021 rozprawu wo wukonjanym dźěle wot delnjoserbskich radźićelow Załožboweje rady wuprosyła."

Zo móže Załožba za serbski lud ze zwyšenjom přiražkow planować, je wupłód angažowaneho dźěła zamołwitych Zwjazka, Braniborskeje a Sakskeje kaž tež čłonow Załožboweje rady a Parlamentariskeje přirady Załožby za serbski lud.