W přihotach na 3-regionowy wuměłstwowy projekt "Wobrazy krajiny" 2019/2020 - Łužica-Korutanska-Koroška - bě Załožba za serbski lud lětsa w měrcu wobdźělenske wubědźowanje wupisała. Na swojim zetkanju 2. oktobra 2018 w Budyšinje bě jury wubědźowanja, kotrejž přisłušeja nimo serbskich institucijow direktorki Muzeja za moderne wuměłstwo Korutanska (Celovec) mag. Christine Wetzlinger-Grundnig a Muzeja za moderne a načasne wuměłstwo Koroška (Slovenj Gradec) dr. Andreja Hribernik, rozsudźiła, kotre wuměłče a wuměłcy so za serbske wizuelne wuměłstwo na wustajeńcy wobdźěla.

Budu to Iris Brankačkowa (molerstwo), Michael Kruscha (molerstwo), Frauke Rahr (film) a Hella Stoletzki (molerstwo). Z Frauke Rahr (*1987) a Hellu Stoletzki (*1996) budźe młoda generacija zastupjena.

Rozsudźace za namakanje konsensa jury njeběchu jeničce zapodaća wubědźowanja, ale zdobom za wustajeńcu předwidźane twórby słowjeńskich a korutanskich wuměłčow a wuměłcow.We wupisanju bu připowědźene, zo so zapodaća wubědźowanja zjawnje prezentuja. Wotpowědna wustajeńca z dohromady 20 plakatami ma so hišće lětsa w schodźišću Serbskeho domu w Budyšinje pokazać.