Wot lěta 2021 sem zesylni Załožba za serbski lud naprawy k regionalnemu skrućenju rěčnych rumow, k pokročowanju digitalizacije a k profesionalizowanju marketinga. Slědujo tute, wot serbskich radźićelow nadźěłane wobsahowe priority, wobzamkny Załožbowa rada dźensa na swojim posedźenju w formje widejoweje konferency swój hospodarski plan za lěto 2021. Móžne su tute přidatne aktiwity prawdźepodobneho zwyšenja přiražki wšěch třoch pjenjezydawarjow dla, kiž pak njejsu hišće wobzamknjene.

"Mam zwyšenje přiražkow za znamjo hłubokeje dowěry do dźěła Załožby za serbski lud. Zo mamy nětko planowansku wěstotu a móžemy zdobom nowe pola skutkowanja natwarić, je wulka motiwacija do přichoda.", hódnoći direktor Załožby za serbski lud, Jan Budar.

Najwyšu prioritu změje nałožowanje serbskeje rěče, za čož dyrbi rěčny koncept nastać a maja so w regionach rěčni motiwatorojo zasadźić, poskitk kursow za hornjoserbsku rěč rozšěrić kaž tež dorostowy studijo za Delnju Łužicu natwarić. Dale ma so kubłanski wobłuk a dźěło ze staršimi podpěrać. Znowa su srědki za pokročowanje digitalizacije zaplanowane, kiž měrja so mjez druhim na prěnje naprawy digitalizaciskeho koncepta, kiž so runje zakónči. Skónčnje zesylnja so srědki na polu marketinga. Hladajo na to, zo srědki za wšě trěbne nowe potrjeby njedosahaja, zaplanuje so budget za prócowanje wo přidatne srědki, mjez druhim z horncow strukturneje změny.

"Sym wjesoła, zo móžachmy najwažniše wobsahowe priority w planje za 2021 wobkedźbować. Přiwšěm pak budźe wažne, sej přidatne srědki strukturneje změny wobstarać, zo móhli na přikład serbsku medijowu pedagogika zaručić." zdźěli předsydka rady, Susann Šenkec, kiž posedźenje nawjedowaše.

Dalši dypk na dnjowym porjedźe bě twarski wulkoprojekt Lawski areal. Po pozitiwnych signalach Sakskeje wobzamknje rada, zo smě Załožba ležownosći města kupić. Wotpowědny rozsud je měšćanska rada hižo w aprylu 2019 wobzamknyła. Próstwa wo financowanje projekta přez krajnu lisćinu strukturneje změny ma so nětko hač do februara 2021 nadźěłać.

Hladajo na to, zo aktualne zrěčenje intendantki SLA, Judith Kubicec, klětu wuběži, wočakuje rada za nalětnje posedźenje rozprawu jeje skutkowanja kaž tež wudźěłanje móžnych potencialow a koncept dalšeho wobsahoweho wuwića ansambla. Direktor Załožby dósta nadawk, do koncepta wuslědki rozmołwow ze sobudźěłaćerjemi, ale tež dalšich fachowcow zapřijeć.

"Zo móže Załožba za serbski lud ze zwyšenjemi přiražki planować, je wupłód njesprócniweho dźěła zamołwitych Zwjazka, Sakskeje a Braniborskeje kaž tež angažowanych zapósłancow. Za planowansku wěstotu wočakuju nětko spěšnje podpisanje noweho finančneho zrěčenja", podšmórny předsyda Parlamentariskeje přirady, Marko Šiman po posedźenju.