Pjatk, dnja 30.09.2022 stej so dobje za zapodaće projektowych próstwow kaž tež za próstwy wo serbske strukturne srědki Sakskeje pola Załožby za serbski lud skónčiłoj.

Za regularne projektowe spěchowanje załožby su so cyłkownje 104 próstwow we wysokosći někak 2,8 mio. EUR za projekty zapodali, kiž maja so w přichodnym lěće přewjesć. Su to mjez druhim kóždolětne próstwy wo spěchowanje wuměłskeho nawoda a probowych lěhwow chórow, rejowanskich skupinow, ansamblow a dźiwadłowych skupinow. Ale tež próstwy na polu nowych hudźbnych projektow a digitalizacije, wuměłstwa a dalšich kulturnych a rěčnych wobłukow załožbje předleža.

Kaž Nicole Zimmermannec ze spěchowanskeho teama zdźěli, “nětko w zarjedźe próstwy na to pruwuja, hač spěchowanskej směrnicy załožby wotpowěduja. Po tym so podłožki kaž tež doporučenja za fachowu přiradu nadźěłaja, kiž wo spěchowanju rozsudźi.” Posedźenje fachoweje přirady za projektowe spěchowanje wotměje so srjedź nowembra.

W spěchowanskim programje "Serbska rěč a kultura w strukturnej změnje" za projekty w Sakskej so tři hižo w meji schwalene projekty tež klětu dale wjedu. Za to so někak 1,55 mio. EUR zaplanuja. “Nimo toho su so pjeć dalšich projektow zapodali z wobjimom někak 590.000 EUR. Tež tute próstwy so nětko pruwuja a za poradźowanski gremij spřihotuja. Tutón schadźuje so wjacore razy, započinajo srjedź oktobra, a doporučenje za Załožbowu radu wudźěła. Doskónčnje rozsudźi Załožbowa rada potom na posedźenju 8. decembra 2022 wo spěchowanju.” rozłoži Michaela Mošowa, zastupowaca direktorka załožby a zamołwita za strukturne projekty.