Koncept za rozšěrjenje serbšćiny w digitalnych medijach, kotryž bu w nadawku Załožby za serbski lud wudźěłany a w nalěću 2021 zjawnosći předstajeny, předleži nětko tež online we formaće wikija.

Wobšěrny digitalizaciski koncept je so po wobsahowych ćežišćach na wšelake podstrony rozdźělił a hodźi so tak lěpje čitać a komentować. “Chcemy zjawnu diskusiju wo koncepće nastorčić a tak koncept přeco dale wuwiwać. Při tym maja so ideje zjawnosće zapřijeć. Format wikija poskića za to wosebje na polu sobudźěła dobre móžnosće. To płaći tež za tych, kiž so jenož za wěsty aspekt serbskeje digitalizacije zajimuja.” praji Daniel Zoba, społnomócnjeny za digitalizaciju pola załožby. Přeje sej, zo so prawje wjele ludźi na diskusiji wobdźěla a konstruktiwne ideje přinošuja.

Wiki digitalizaciskeho koncepta namakaće pod koncept.serbski-inkubator.de  

Wo namjetach a wuslědkach z diskusijow budźe so tež na přichodnej digitalizaciskej konferency rěčeć, kotraž wotměje so sobotu, 4. decembra 2021 online.