Załožba za serbski lud zhladuje na dźěłapołne a zajimawe lěto 2023, wosebje přiběracych próstwow wo spěchowanje a změnow zarjadniskich předpisow dla. Tež něštožkuli změnow personala běchu w załožbowym zarjedźe přez započatk a zakónčenje staršiskich časow kaž tež nowych radźićelow w załožbowej radźe, w kotrejž su nětko nowo woleni zastupjerki a zastupjerjo serbskeho ludu. Tući su mjeztym derje zadźěłani.

Prjed hač so něhdyši radźićeljo rozžohnowachu, mějachu hišće někotre pokiwy za přichod. Pomjenowachu digitalizaciju jako jedyn z najwažnišich elementow, zo by so serbska rěč zdźeržała a dale wuwiła, ale tež zo bychu so zarjadniske wotběhi pospěšili a institucije přesahowace zhromadne dźěło polěpšiło. Kompleksnosće a wobjima digitalizacijow dla by nowa přidatna personalna struktura kaž tež poradźowacy gremij fachowcow trěbny był. Za to dyrbi so derje kwalifikowany personal zapřijeć. „Tu widźimy naše prěnje wužadanje“, praji Jan Budar, direktor załožby, „přetož kaž druhdźe tež, trjebamy tež my w serbskich institucijach kmany fachowy personal, kotryž zdobom serbsce rěči. Mamy hižo nětko ćeže wšitke wotewrjene městna w serbskich institucijach a w projektach strukturneje změny adekwatnje wobsadźić. Tak widźimy, zo dyrbimy poskitki za spěšne nawuknjenje serbšćiny nuznje dale wutwarjeć.“

Druhe wužadanje je, kaž Jan Budar rozkładźe, financowanje. Zakład za załožbowy etat je podpěra wotpowědnje aktualnemu financnemu zrěčenju - za projekty digitalizacije so samo přidatne srědki Zwjazka a Swobodneho stata Sakskeje přizwola. Tohodla je załožba dźakowna, zo je Zwjazkowy sejm přiražki Zwjazka za 2024 w planowanej wysokosći wobzamknył a nadźija so, zo tež 2025 skrótšenja njehroža.

Zawěsćene su porno tomu hižo srědki za dalše planowanje Lawskeho areala. Kónc septembra ma so tón naćisk dozhotowić, kotryž bu z planowanskim architekturnym běrowom, fachowymi planowarjemi, Serbskim institutom, Serbskim muzejom a ze załožbu wothłosowany. Tutón je potom zakład za próstwu wo financy za zwoprawdźenje twara.

„Hladajo na aktualnje napjatu financnu situaciju Zwjazka a krajow zhladujemy napjeće na jednanja za 5. financne zrěčenje. Tu kładźe so zakład za lěta 2026 do 2030. Přidatnje k tomu, zo chcemy tuchwilnu zestawu institucijow zdźeržeć, smy dalšu potrjebu přizjewili, zo móhli runje w rosćacych wobłukach kaž stej to rěčna rewitalizacija a digitalizacija z dźěłom pokročować“, tak załožbowy direktor. W tutym zwisku so nadźija, zo so tež nowe knježerstwa krajow a Zwjazka, kotrež maja so lětsa a klětu wolić, dale k serbskemu ludej a jeho rěči a kulturje wuznawaja a Serbow w dosahacej měrje financielnje spěchuja.