Delnjoserbska wučerka a žurnalistka Marja Elikowska-Winklerowa dóstanje na dźensnišej soboće Myto Ćišinskeho 2019 Załožby za serbski lud. Myto spožči so w lěće 1951 w Poznanju rodźenej Pólce za jeje dołholětne a njesprócniwe skutkowanje za zdźerženje a daledawanje delnjoserbskeje rěče we wšitkich generacijach kaž tež za wobstajnu podpěru serbskich kulturnych a trajnych projektow w Delnjej Łužicy.

Spěchowanske myto k Mytu Ćišinskeho spožči so teamej Radija Satkule, młodźinskeho wusywanja MDR-Serbskeho rozhłosa. Dlěje hač 20 lět hižo prezentuja młodźi Serbja, mjez nimi šulerjo, wučomnicy a studenća, na zajimawe a originelne wašnje młodźinske temy w hornjoserbskej rěči w rozhłosu, nowych medijach a na zjawnych zarjadowanjach. Z tym přinošuja njeparujomnje k skrućenju narodneho wědomja a identity mjez młodej serbskej generaciju.

Zarjadowanje započnje so w 15.00 hodź. na Čerwjenej žurli klóštra Marijina Hwězda w Pančicach-Kukowje.

Myto Ćišinskeho spožča so za wusahowace zasłužby na polu serbskeje kultury, wuměłstwa a wědomosće. Z nim spomina so na klasikarja serbskeje literatury Jakuba Barta-Ćišinskeho (1856-1909). Hłowne myto je ze 7.500 eurami dotěrowane, spěchowanske z 2.500 eurami. Załožba wěnuje tute myto wuznamnym wosobinam z Hornjeje a Delnjeje Łužicy wot lěta 1995 sem kóžde druhe lěto.

Kontakt za dalše informacije:
Załožba za serbski lud
Michaela Mošowa
telefon 03591 550320
moosche-stiftung@sorben.com