Kónc měrca je so doba za zapodaće próstwow wo projektowe spěchowanje załožby za projekty druheho połlěta 2023 skónčiła. Zarjadej předleža cyłkownje 69 próstwow ze spěchowanskim wolumenom wot 299 TEUR. Nimo probowych lěhwow spěwnych a rejowanskich skupinow su so tójšto nowych projektow na wuměłskim polu zapodali (n. př. přewjedźenje hudźbnych koncertow, nahrawanja spěwow, filmy, přihotowanje wustajeńcow, atd.). Tež spěchowanje narodnych drastow so přez wšelakore towarstwa a pěstowarnje wuprosy.

Wobdźěłarki załožby nětko próstwy přehladaja a pisaja doporučenja za fachowu přiradu za projektowe spěchowanje. W meji wuradźuje fachowa přirada zhromadnje ze sobudźěłaćerjemi załožboweho zarjada wo móžnym spěchowanju.

Dokelž předwidźi nowy zarjadniski wukaz sakskeho financneho ministerstwa, zo maja próstwustajerjo wulki dźěl projektowych kóštow předfinancować, prócuja so sobudźěłaćerjo załožboweho zarjada tuchwilu wo to, wuwzaćne rjadowanje wupłaćenja do spěchowanskich směrnicow zapřijeć. Tute wobnowjenje spěchowanskeje směrnicy ma Załožbowa rada w swojim mejskim posedźenju schwalić.

Nimo toho ma Załožbowa rada tež směrnicu spěchowanskeho programa "Serbska rěč a kultura w strukturnej změnje" za projekty w Sakskej přiměrić a posledni termin zapodaća próstwow na 31. julij změnić (dotal 30. september), štož ma hižo wot lětušeho płaćić. Změna termina je trěbna, zo bychu so w zarjedźe rozsudy sčasom móhli přihotować a trěbne financielne srědki pola Zwjazka přizjewić. Dokelž pak wotměje so přichodne posedźenje rady hakle 23. meje 2023, prosymy wšitkich projektowych nošerjow, so ze zapodaćom próstwy wo strukturne srědki Sakskeje hižo nětko na nowym terminje orientować.