Nuznosć, zrěčenje wo financowanju Załožby spěšnje podpisać

Nowe statne zrěčenje wo financowanju Załožby za serbski lud měło so tak spěšnje kaž móžno podpisać. Tež hdyž njeje to lětsa wjac móžno, měli Zwjazk, Sakska a Braniborska dokument spočatk lěta 2021 podpisać a tak dźěławosć załožby zaručić. To je sej Parlamentariska přirada załožby póndźelu 23.11.2020 na swojim 65. posedźenju žadała, kiž wotmě so prěni króć wirtuelnje.

Z předsydu přirady, čłonom krajneho sejma Markom Šimanom, běchu sej zapósłancy Zwjazkoweho sejma a krajneju sejmow, zastupjerjo Zwjazka, kraja Braniborska a Swobodneho stata Sakska přezjedni, zo ma so zrěčenje na najwyšej runinje přez ministerskeju prezidentow a ministra podpisać. Wotpowědne přihoty za nowe 4. financne zrěčenje běža z lěta 2018 pod nawodom Swobodneho stata Sakska.

Direktor załožby Jan Budar předstaji w tutym zwisku staw přihotow za přichodny etat a 5 lětny financny ramik załožby. Wothłosowanje etatow pjenjezydawarjow wočakuje so za december a přichodne nalěćo.

Zapósłancaj Zwjazkoweho sejma dr. Klaus-Peter Schulze (CDU) a Silke Lehmann (SPD), pokazaštaj na jeju prócowanja za financowanje załožby kaž tež za naležnosće Serbow při strukturnej změnje.

Zakoń za přesadźenje k zesylnjenju strukturow po brunicy, kiž je Zwjazkowy sejm dnja 03.07.2020 wobzamknył, zawěsći we wotpowědnym artiklu tež spěchowanje naležnosćow Serbow. Předsydka Załožboweje rady Susann Šenkec rysowaše dotalne zhromadne naprawy, pokazujo na podpěru ze Zwjazkoweho ministerstwa za nutřkowne, twar a domiznu. Přirada formulowaše wočakowanje, natwarić nošnu strukturu za serbske naprawy strukturneje změny a tute prócowanje mjez Zwjazkom a krajomaj wothłosować. Hač do hód ma so pruwować, kak móža so serbske projekty najspěšnišo zwoprawdźić a kak mjez Hornjej a Delnjej Łužicu koordinować.

Dale tematizowaše Parlamentariska přirada situaciju na polu kubłanja, wosebje w Delnjej Łužicy. Rozjimachu při tym wotmołwy Braniborskeho knježerstwa na małke naprašowanje čłonkow Braniborskeho krajneho sejma Dannenberg a Schier, kotrejž stej zdobom čłonce Parlamentariskeje přirady. Eksistowaca sep móžnych naprawow za wukubłanje pedagogiskeho personala ma so skónčnje zaměrnje zwoprawdźić. Předsyda přirady
Marko Šiman praji k tomu Serbskim Nowinam: "Sakska a Braniborska matej wjace za wučerski dorost činić a dyrbja tež puće namakać, studentow zdobyć, kotřiž sej serbšćinu w běhu studija přiswoja, zo bychu ju wuwučowali. Nimo uniwersitow stej wobě knježerstwje wužadanej wjace na nohi stajić. Z uniwersitow dyrbi trěbna ličba serbskich wučerjow wuńć. W tym hižo žane wurěče wjace njeakceptuju, wot nikoho." (citat z artikla, dnja 24.11.2020)

Čłonojo witachu připowědźene wuradźowanje k podpěrje europskeje mjeńšinoweje iniciatiwy MinoritySafePack, kotrež budźe w Zwjazkowym sejmje pjatk, dnja 27.11.2020.