Java Script ist deaktiviert!

Damit die Seite mit vollem Funktionsumfang korrekt dargestellt werden kann, muss Java Script aktiviert sein.

Přehlad nowinskich zdźělenkow Załožby

 

Wosebity koncert na spočatku lĕta 2019 – „Slědy“

Budyšin,

Rjad koncertow pod mjenom "Wosebity koncert na proze do noweho lěta" eksistuje mjeztym 23 lět a podpěruje so wot Załožby za serbski lud na bazy projektoweho spěchowanja. Wón je so w serbskim sydlenskim rumje kaž tež we wědomju tu bydlacych a na kulturje zajimowanych krajanow etablěrował.

Lětsa dožiwjamy wobsadku klawěrneho kwarteta. Tematisce wěnuja so koncerty hłownje 200. narodninam Clary Schumann a spomnjeću na 2018 zemrěteho Detlefa Kobjele - spěchowarja tutoho koncertneho rjadu, kotryž je tomu wšitke lěta ze swojimi kompozicijemi přinošował. Runočasnje su z titulom slědy měnjene, kotrež su wšitcy dalši komponisća a sobuskutkowacy tutoho rjadu hač do dźensnišeho zawostajili. Wot tuteje mysle wjesć dachu so komponisća Jan Cyž, Sebastian Elikowski-Winkler, Johannes Kretschmer, Ulrich Pogoda a Heinz Roy. Woni dóstachu nadawk, twórbu komponować, kotraž ma so w koncerće k prěnjemu razej předstajić. Zaklinča tež twórby za duwo z pjera serbskeju komponistow Jura Mětška a Detlefa Kobjele. Jimaj přidruža so twórby Beethovena a Clary a Roberta Schumanna z dychwotražacej rjanosću a wěčnej čerstwosću.

Moderacija leži w rukomaj serbskeho hudźbneho wědomostnika a moderatora rbb Gregora Kliema, kotryž - wobsahowe zwiski tworjo - informatiwnje a lóštnje dwurěčnje přez program powjedźe. Sćelak rbb koncert w Lubinje natoči a wusyła.

Za čas wobstaća tutoho koncertneho rjadu bu w minjenych lětach něhdźe 60 nowych serbskich kompozicijow tworjenych a předstajenych. Tute twórby za najrozdźělniše wobsadki wobohaćeja sylnje serbske kulturne žiwjenje a steja za dalše předstajenja k dispoziciji.

Wjeselimy so, zo směmy nimo w Serbach nic wjace njeznateju hudźbnicow Waltraut Elvers (brača) a Gabriellu Strümpel (wioloncello) tónkróć mjezynarodnje skutkowaceho ameriskeho huslerja Michaela Yokasa angažować. Wón koncertuje w

tutym ramiku k prěnjemu razej. Zhromadnje ze serbskej pianistku Heidemarie Wiesnerjec formuja woni klawěrny kwartet, kotryž připosłucharjow k nowym zwukowym dožiwjenjam ponjese.

Z twórbami Beethovena - Cyža - Elikowski-Winklera - Kobjele - Kretschmera - Mĕtška - Pogody - Roya - Roberta a Clary Schumann.

sobuskutkowacy:

Michael Yokas - wiola
Waltraut Elvers - wiola
Gabriella Strümpel - wioloncello
Heidemarie Wiesnerjec - klawěr

terminy:

Berlin - Schwarzsche Villa - 12.1.2019 - 20.00 hodź.
Wojerecy - Hród - 13.1.2019 - 16.00 hodź.
Budyšin - Serbski muzej - 19.1. 2019 - 19.30 hodź.
Lubnjow - Woponowa žurla (Wappensaal) - 27.1. 2019 - 17.00 hodź.
Lipsk - Schumannowy dom (Schumann Haus) - 23.2.2019 - 18.00 hodź.

Kartki za płaćiznu 10 € resp. potuńšene 8 € so při wječornej pokładni předawaja.