Java Script ist deaktiviert!

Damit die Seite mit vollem Funktionsumfang korrekt dargestellt werden kann, muss Java Script aktiviert sein.

Medijowe wózjawjenja (archiw)

 

Z pósejźenja Załožboweje rady, stwórtk, 20.05.2021

Budyšyn,

Pódpisanje Stwórtego financnego dogrona bliske
Prezentacija digitalizaciskego koncepta / Serby pśewzeju SAEK Budyšyn

Start do pósejźenja Załožboweje rady jo twóriło Stwórte financne dogrono ku zgromadnemu financěrowanju Załožby za serbski lud pśez Zwězk, Bramborsku a Lichotny stat Sakska w lětach 2021-2025, kótaremuž jo mjaztym tek Bramborske statne kněžaŕstwo na kabinetowem pósejźenju 18. maja 2021 pśigłosowało.

"Z tym jo pódpisanje Stwórtego financneho dogrona blisko," jo zwurazniła pśedsedaŕka Załožboweje rady Susann Šenkec, kótaraž jo pósejźenje nawjedowała. "Z pówušenim pśipłaśonkow wot 2021 ma Załožba za serbski lud prědny raz w swójich stawiznach móžnosć, do nowych rěcnych a žywjeńskich rumow inwestěrowaś. Mam pówušenje pśipłaśonkow za znamje dłymokeje dowěry do źěła załožby. Až móžo wóna něnto z pówušenim pśipłaśonkow zaměrnjej planowaś, jo wupłód angažěrowanego źěła zagronitych Zwězka, Bramborskeje a Sakskeje ako teke cłonkow Parlamentariskeje pśirady Załožby za serbski lud."
Źěk wobtwarźił jo teke wótpósłańc w Sakskem krajnem sejmje a pśedsedaŕ Parlamentariskeje pśirady załožby, Marko Šiman. Wón jo pódšmarnuł, až wótcakujo něnt wjelgin malsnje pódpisanje dogrona.

Dalej jo Załožbowa rada w běgu pósejźenja zwěsćiła jadnogłosnje wótlicenje góspodaŕskego lěta 2020 Załožby za serbski lud.

W pśiducem dypku dnjownego pórěda jo se rada zaběrała z digitalizaciju a serbskim digitalizaciskim konceptom. W lětoma 2019/2020 w nadawku Załožboweje rady naźěłany koncept a prědne napšawy k pśesajźenju su se gremijoju pśedstajili. Wobłuki, ako zawězanje serbskeje rěcy do nacasnych rěcnych technologijow a wózjawjenje a wutwaŕ digitalnych póbitowanjow k pódpěranju nawuknjenja a nałožowanja serbšćiny maju prioritu. "Z digitalizaciskim konceptom pśedlažy nam něnt dobry zakład za rozsudy wó aktiwitach w pśiducych lětach. Až móžomy w juliju zagronitego za digitalizaciju pśistajiś, jo wažny kšac pśi zwopšawźenju koncepcije, kótaryž sam pak njebuźo dosegaś. Togodla jo pśedwiźone, až se za toś ten wobłuk w pśiducych mjasecach a lětach resurse, kooperacije a partnaŕstwa systematiski wutwarjuju," měni direktor Załožby za serbski lud, Jan Budar. Pandemije dla se pśewjeźenje dalšneje digitalizaciskeje konference hyšći raźiło njejo, to se pak lětosa w nazymje nachwata, aby se koncepcija zjawnosći pśedstajiła a se wó naraźonych napšawach diskutěrowaś mógało.

W nastupnosći Serbskego instituta z.t. jo Załožbowa rada pśigłosowała zarědowanju pśidatneju źěłoweju městnowu we wobłuku institucionelnego spěchowanja: stej to městno za management tśeśich srědkow a městno za computerowu linguistiku/rěcne technologije/programěrowanje. Z tym ma se dojśpite zawěsćiś a digitalne prezentěrowanje slěźeńskich wuslědkow dalej wuwijaś.

Skrotka jo informěrował direktor załožby radu tek wó stawje naźěłanja koncepcije "Serbski forum wědy na Lawskem arealu".

Załožbowa rada jo wobzamknuła, až ma se pó wótgłosowanju ze zastojnstwami, zagronitymi za rěcne resurse, open-data-směrnica naźěłaś. Zaměr směrnice jo zmóžnjenje lichotnego wužywanja serbskich rěcnych resursow za natwaŕ a dalšne wuwijanje projektow, kótarež nałožowanje serbšćiny pódpěruju.

Załožbowa rada ma se w pśichoźe wó rěcnej situaciji w spěchowanych institucijach informěrowaś. W pśichoźe maju se toś w góspodaŕskich jadnanjach załožby ze spěchowanymi institucijami rěcnopolitiske zaměry definěrowaś, kótarež wótpowěduju załožbowemu wótmysłenju.

Dalej su se załožbowe raźiśele dorozměli wó móžnosći, statkowanje SAEK Budyšyn ze serbskim fokusom pókšacowaś a pó pótrjebje rozšyriś. Kóńc junija 2021 wuběžyjo spěchowanje SLM (Sächsische Landesmedienanstalt) za SAEK Sakskeje, tek studijo w Budyšynje ma se zacyniś. Zaměr jo, statkowanje SAEK, póśěgujucy se na serbske aktiwity, zdźaržaś, pśi tom nejwažnjejše wobłuki wutwariś a na cełu Łužycu rozšyriś. Aby se w fazy natwari a wuproběrowanja koncept naźěłał, dejał se SAEK z wjelikim źělom techniskego wugótowanja a studijowym wjednikom Michałom Cyžom wot 01.07.2021 na projektowej bazy wót załožby pśewześ. Ku zachopjeńkoju lěta 2022 ma se pótom noseca struktura wutwóriś.

Za kuratorij Myta Ćišinskego su wobtwarźili załožbowe raźiśele za nowu wólbnu peroidu 2021-2026 cłonkow Susann Šenkec, Marion Stenselowu, Leńku Thomasowu, Měranu Cušcynu, Martinu Nowakojc, dr. Janu Šołćinu, Manfreda Hermaša a Jana Bělka.

W dalšnem dypku dnjownego pórěda su dejali raźiśele wó pšosbje towaristwa Smy z.t. rozsuźiś. Załožbowa rada jo wótpokazała pšosbu Smy z.t. wó institucionelne spěchowanje Serbskego Sejma z dnja 01.12.2020. Z tym, až stajijo pśedmjat spěchowanja eksistencu załožby do pšašanja, njewótpowědujo wón daniž załožbowemu wótmyslenju, ako w statnem dogronje wó załoženju Załožby za serbski lud wopisany, daniž wóli załožarjow Załožby za serbski lud.

Na pšosbu pśedsedaŕki Załožboweje rady, Susann Šenkec, su spominali raźiśele skrotka śicho na njabogego fararja Clemensa Hrjehorja, kótaryž jo był wót 1999 do 2000 pśedsedaŕ Załožboweje rady.

informacija medijam (pdf)