Załožbowa rada jo na swójom wurědnem pósejźenju wałtoru, dnja 13.08.2024 pśizwóliła, až se nowe źěłowe městna w serbskich institucijach, kenž su tuchylu až do kóńca 2024 wobgranicowane, teke w lěśe 2025 financěruju.

Cełkownje pótrjefijo to 26 źěłowych městnow, kótarež su se wót lěta 2021 wutwórili.
„Toś te městna zarucuju źěłabnosć we wobłukach, kenž maju za Serbow wusoku prioritu a kenž njejsu se do lěta 2021 felujucych resursow dla wótpowědnje wobglědowaś mógali.“, se pśedsedaŕ Załožboweje rady, Marko Kowar, wjaseli. Direktor załožby, Jan Budar, doda: „Jo dobry signal, až mógu se městna dalej wjasć. Weto pak jo wobsajźenje casowje wobgranicowanych městnow glědajucy na źinsajšne źěłowe wiki wjelike wupominanje. Toś jo naš pśichodny zaměr, městna trajnje zarucyś.“

Z pódlejšonych městnow su

• 7 pla Domowiny (mjazy dr. za rěcnej motiwatorow za Dolnu Łužycu),
• 3 w Rěcnem centrumje WITAJ (mjazy dr. za docenta za górnoserbšćinu),
• 3 w Ludowem nakładnistwje Domowina
• (mjazy dr. za zmócnjenje redakcijow Serbskich Nowin a Nowego Casnika),
• 4 w Serbskem instituśe (mjazy dr. za monitoring serbskego pismojstwa),
• 1 w Nimsko-Serbskem ludowem źiwadle (serbski marketing),
• 1 w Šuli za dolnoserbsku rěc a kulturu (docentka),
• 1 w Serbskem šulskem towaristwje (jadnaŕ) a
• 6 w DomPro w Dolnej Łužycy (Dolnoserbska kulturna akademija).

Slězyna: W lěśe 2021 su pówušyli wšykne tśi pjenjezedawarje z nowym financěrowańskim dogronom k financěrowanju Załožby za serbski lud swóje pśipłaśonki. To zmóžnijo napóranje nowych źěłowych městnow, kenž pak su byli nejpjerwjej raz na tśi lěta wobgranicowane. Łoni nazymu jo pódlejšyła Załožbowa rada toś to wobgranicowanje na kóńc 2024. Pópšawem pśedwiźone pódlejšenje na kóńc 2025 jo se tencas wótpokazało, dokulaž njejo jasne było, lěc se pśipłaśonk Zwězka napněte financneje situacije dla we wócakanej wusokosći pśizwólijo. Pó tom, až jo zwězkowe kněžaŕstwo pśedłogu etatowego plana 2025 srjejź julija wobzamknuło, pak wěmy, až se pśipłaśonk za załožbu njeskrotcyjo. To jo było wuměnjenje zastupnikow Zwězka w Załožbowej raźe, kenž maju rowno drugim pjenjezedawarjam weto-pšawo w financnych nastupnosćach, až směju se městna až do kóńca 2025 dalej wjasć.

Kak z městnami wót 2026 dalej pójźo, rozsuźijo se na zakłaźe eksterneje ewaluacije, kótaraž ma lětosa nazymu Załožbowej raźe pśedlažaś. Zrownju běže rowno jadnanja wó pśichodne financěrowańske dogrono, kótarež ma financěrowanje Załožby za serbski lud wót 2026 do 2030 zawěsćiś.

Protokol wobzamknjenjow 13.08.2024 (nimski)