Java Script ist deaktiviert!

Damit die Seite mit vollem Funktionsumfang korrekt dargestellt werden kann, muss Java Script aktiviert sein.

Medijowe wózjawjenja (archiw)

 

Wupisanje dźěłoweho městna w Załožbje za serbski lud

Budyšyn,

Nadawk Załožby za serbski lud njeje jenož spěchowanje serbskich projektow a institucijow a přewjedźenje swójskich projektow, ale tež wid do přichoda, analyza aktualnych potrjebow a wuske zhromadne dźěło z gremijemi. Za podpěru při tym pytamy nuznje

asistencu wjednistwa w Budyšinje.

Zamołwite nadawki su wotměnjawe a wobjimuja wosebje slědowace wobłuki:

  • koordinacija Załožbowych gremijow (organizacija a přihot posedźenjow, protokolowanje a wuhódnoćenje, běžna komunikacija),
  • organizatoriska podpěra při nadźěłanju konceptow a analyzow,
  • zamołwitosć za strukturu digitalnych datow (kontakty, terminy, mejlki, akty) a
  • nawod běrowa direktora.

Za to pytamy wosobu, kiž ma:

  • nazhonjenja na polu projektoweho managementa, formalneje komunikacije w němskej a serbskej rěči kaž tež eficientneho wobchada z digitalnymi gratami a dokumentami (tuchwilu Microsoft Office, Outlook a Acrobat PDF),
  • wukubłanje na polu managementa, zarjadnistwa, komunikacije abo přirunajomne wotzamknjenje
  • organizaciski talent, samostatnosć a strukturowane wašnje dźěławosće a
  • w idealnym padźe znajomosće na polu digitalizacije procesow.

Załožba skići wam naročne nadawki, dźěło w přećelnym a nazhonitym teamje a wobšěrne, intensiwne zawjedźenje do noweho skutkowanja. Dźěłowy čas wobjimuje tuchwilu 40h/tydźeń (mjenje po dorěčenju móžne). Městno je w Budyšinje a hódnoći so po tarifje TV-L.

Smy waš zajim zbudźili?

Wjeselimy so na waše požadanje hač do 23. julija 2020 digitalnje na stiftung-bautzen@sorben.com
abo z póštu na: Załožba za serbski lud, Póstowe naměsto 2, 02625 Budyšin.