Pódpisanje Stwórtego dogrona financěrowanja Załožby za serbski lud pśez zwězkowego ministarja za nutśikowne, twaŕstwo a domownju, Horst Seehofer, ministaŕskego prezidenta Lichotnego stata Sakska, Michael Kretschmer a ministaŕskego prezidenta Bramborskeje, dr. Dietmar Woidke, jo se wałtoru, 20. julija 2021 w digitalnem formaśe wótměło.

Južo kóńc lěta 2018 jo załožba zachopiła internje wó financěrowanju za cas wót 2021-2025 jadnaś. Źěkowano njewomucnych procowanjow na kněžaŕstwowej a parlamentariskej rowninje jo se raźiło, pśipłaśonk wót lěta 2021 pówušyś. Wše tśi dawarje financielneje pódpěry, Zwězk, Lichotny stat Sakska ako teke Bramborska, su to w swójich etatowych planach za 2021 resp. za 2021/2022 wobzamknuli.

Ze Stwórtym dogronom wobstoj něnt planowańska wěstosć a pówušyjo se cełkowne spěchowanje dawarjow financielneje pódpěry wót něnt 18,6 milionow euro na 23,92 milionow euro. Wót togo dawa Zwězk lětnje 11,96 milionow euro, 7,97 milionow euro Lichotny stat Sakska a 3,99 milionow euro Bramborska.

W krotkem wuźěkowańskem wideo su cesćili zastupniki załožby, Domowiny a sakskego krajnego sejma pódpisanje.

Susan Šenkojc, pśedsedaŕka Załožboweje rady Załožby za serbski lud: "Źinsa pódpisane Stwórte dogrono financěrowanja Załožby za serbski lud wóznamjenjujo w 30. lěśe wobstaśa załožby jasne wuznaśe dawarjow financielneje pódpěry. Za to słuša Zwězkoju, Lichotnemu statoju Sakska a Bramborskej naš wurazny źěk.
Dožywijomy historiski moment a gromaźe ze strukturneju změnu we Łužycy wujdu za nas a za pśiduce generacije nowe wupominanja a móžnosći, kótarymž comy wótpowědowaś."

Jan Budar, direktor Załožby za serbski lud: "Pówušenje financielneje pódpěry njezawěsćijo jano doněntajšne źěło załožby a spěchowanych serbskich institucijow, ale teke zwopšawdnjenje nowych napšawow. Pówušenje gódnośijom ako znamje dłymokeje dowěry do našogo źěła. Až mamy něnt planowańsku wěstosć a rownocasnje nowe póla źěłabnosći wótwóriś móžomy, jo mě a wšym sobuźěłaśeŕkam a sobuźěłaśerjam wjelika motowacija za wupominanja, kenž pśed nami laže."

Marko Šiman, pśedsedaŕ Parlamentariskeje pśirady Załožby za serbski lud: "Pówušenje financielneje pódpěry za Załožbu za serbski lud mamy se źěkowaś njewomucnemu zasajźenju zastupnikow zwězkowego kněžaŕstwa, wótpósłanym Ninskego zwězkowego sejma, Lichotnego stata Sakska a Bramborskeje a cłonkam Parlamentariskeje pśirady. To jo pśeznanjece wuznaśe k wuznamoju serbskeje rěcy a kultury ako teke jasny signal za pśichod Serbow."

Dawid Statnik, pśedsedaŕ Domowiny: "Ze źinsajšnym pódpisanim wóstanu Zwězk, Bramborska a Lichotny stat Sakska spušćobne partnarje serbskego luda. Kněžaŕstwa a parlamenty su se w zajźonych lětach wopokazali ako swěśaki nacasneje politiki we wobchadanju ze serbskim ludom. Rownocasnje se wšym rěp wukšuśujo, kenž se za pśichod serbskego zasajźuju."

wuźěkowańske wideo

medijowa informacija BMI, 20.07.2021