Na pósejźenju Parlamentariskeje pśirady Załožby za serbski lud dnja 11.09.2023 w Pódstupimje su se cłonki na wózjawjenje slědujucego stojnišća dojadnali:

Stojnišćo Parlamentariskeje pśirady Załožby za serbski lud za měrnu zgromadnosć wobydlarjow we Łužycy z tolerancu a respektom

Parlamentariska pśirada Załožby za serbski lud wótpokazujo kuždycku formu ekstremizma. Pšawicaŕske nadpady na wósoby w šuli w bramborskich Bórkowach (Błota), kótarež su byli z wósobinskim póniženim zwězane, nejwótšyrjej zasuźuju. Wósebnje zjawne pśeslědowanje wucabnikow, kótarež stej zjawne wó tšojenjach informěrowałej, njejsu w našej demokratiji akceptabelne. Šula dej byś městno wuknjenja, respekta a mjazsobneje cesći. Gramota a namóc njesmějotej se w našom kraju zasedliś.

Nadawk Załožby za serbski lud wóstanjo teke w pśichoźe mjazy drugim spěchowanje měrneje zgromadnosći we Łužycy a z tym wužywanje šansow demokratije. Parlamentariskej pśiraźe jo wažne, wuwiśe rěcy a kultury Serbow dalej pódpěrowaś a teke pśez wjelebocnu kulturu rozměśa mjazy Serbami a Nimcami pówušyś. Zakład za to twórje respekt, cesćownosć a toleranca na šulach a w towarišnosći.

Dalšne temy pósejźenja su byli pśigóty na pěte financěrowańske dogrono za cas 2026-2030 a pśiměrjenje myta w LND.

Parlamentariska pśirada jo organ Załožby za serbski lud, kenž póraźujo nejwušy a rozsuźecy organ, Załožbowu radu. Jej pśisłušaju zastupnika Zwězkowego sejma, zastupnika Sakskego krajnego sejma a zastupnika Krajnego sejma Bramborskeje. Pśedsedaŕ pśirady jo wót 1995 Marko Šiman (wótpósłańc Sakskego krajnego sejma).