Intendantka Judith Kubicec wopušći Serbski ludowy ansambl k 31.07.2021.
Što rěka to za dalše wuměłske skutkowanje SLA?

Jako Judith Kubicec 01.08.2018 jako intendantka SLA nastupi, zwurazni wona, zo chce čas jeje na tři lěta wobmjezowaneho zrěčenja za posudźowanje wužić, hač so jeje wuměłske předstawy a Serbski ludowy ansambl hromadźe hodźa. Po něšto wjac hač lětomaj, z toho skoro cyła hrajna doba pod wobmjezowanjemi korony dla, rozsudźi so, zo njesteji za móžne podlěšenje zrěčenja k dispoziciji. "Sym wjednistwo jeničkeje serbskeje profesionalneje wuměłskeje institucije za hajenje našeje hudźbneje kultury z narodneho wědomja sem nastupiła. Zhromadnje z chórom, orchestrom a rejowarjemi chcych serbske hudźbne wuměłstwo dale wuwiwać, kwalitu powyšić a z tym lěpšu rezonancu skutkowanja SLA we Łužicy a zwonka docpěć. Pod tuchwilnymi wobstejnosćemi w SLA njewidźu za zwoprawdźenje swojich narokow přichod.", Judith Kubicec swójski rozsud potwjerdźi. Z tym so jeje skutkowanje jako intendantka ke kóncej tuteje hrajneje doby skónči.

Direktor Załožby za serbski lud, kotraž je zdobom towaršnik SLA, Jan Budar, wosobinsce wobžaruje, "zo tajka kompetentna wosoba kaž Judith Kubicec ansambl wopušći. Sym pak dźakowny za wažne hódnoćenja a pokiwy, kiž je wona nam w času jeje skutkowanja za dalše wuwiće domu dała. Tute budu nam tež po jeje wotchadźe dobra směrnica."

Jedyn z prěnich iniciatiwow intendantki bě přestrukturěrowanje a digitalizacija notoweho archiwa. Tutón bě so dobry lětdźesatk chětro zanjechał, tak zo staw archiwa hódnoće tutoho jónkrótneho žórła serbskeje hudźby njewotpowědowaše. Runje tak spózna Kubicec spěšnje, zo njejsu wěste klučowe pozicije za wšědny organizatoriski wotběh optimalnje wobsadźene, štož zamó zdźěla přez interne přestrukturowanja změnić. Hižo na kóncu jeje prěnjeje hrajneje doby předstaji Kubicec w meji 2019 Załožbowej radźe prěni interny mjezyrezimej.

Jako so w Załožbowej radźe w nazymje 2020 wo tym rozprawješe, zo Judith Kubicec jako intendantka hižo dlěje k dispoziciji njesteji, dósta direktor załožby nadawk, zjimać dopóznaća zašłych lět a z toho wotwodźić koncepcionelne doporučenja za přichodne wuwiće ansambla. Prěnje rozmołwy z eksternymi ekspertami a wubranymi přistajenymi domu je Jan Budar hižo wjedł. Na zakładźe jeho namjetow změje Załožbowa rada na swojim posedźenju srjedź meje rozsudźić, kak potom wot 01.08.2021 dale póńdźe. Zo su so serbscy a komunalni zastupjerjo Załožboweje rady w nalěću 2017 ze žadanjom přesadźili, intendancu znowa wobsadźić, ma Jan Budar přiwšěm za prawy krok doprědka: "Wuměłski nawod měł tež w přichodźe wotežki Serbskeho ludoweho ansambla w rukomaj měć, tež hdyž wuběr za nowowobsadźenje městna runjewon wulki njeje. A hač je dwójna hłowa prawy konstrukt, měło so hišće raz dokładnje wuhódnoćić."

Fokus aktualnych rozsudow leži na rjadowanym přepodaću wšěch wuměłskich naležnosćow, wosebje nastupajo planowanje přichodneje hrajneje doby. Tohodla přewozmje zastupjer intendantki, Tomaš Kreibich-Nawka, hač do kónca hrajneje doby najwažniše interne nadawki a so při tym wusko z Judith Kubicec wothłosuje.