Sakske statne knježerstwo je w dźensnišim kabinetowym posedźenju (23. měrca 2021) přihłosowało Štwórtemu finančnemu zrěčenju k zhromadnemu financowanju Załožby za serbski lud přez Zwjazk, Swobodny stat Sakska a Kraj Braniborska w lětach 2021-2025. (hlej připołožene nowinske zdźělenje SMWK "Sachsen sichert Finanzierung der Stiftung für das sorbische Volk")

Z jasnym stopnjowanjom přiražkow njezaruči so jenož dotalne dźěło załožby, ale tež zwoprawdźenje nowych naprawow. K tomu praji Jan Budar, direktor Załožby za serbski lud: "Ze zwyšenjom přiražkow wot 2021 ma Załožba za serbski lud prěni raz w swojich stawiznach móžnosć, w nowych nuznje trěbnych wobłukach skutkować. Hłownje su to skrućenje rěčnych rumow, profesionalizowanje marketinga a zapři­jeće serbšćiny do modernych rěčnych technologijow. Mam zwyšenje přiražkow za znamjo hłubokeje dowěry do dźěła załožby. Zo mamy jako Serbja nětko planowansku wěstotu a móžemy zdobom nowe pola skutko­wanja natwarić, je wulka motiwacija do přichoda."

Předsyda Domowiny, Dawid Statnik, wupraja so takle: "Smy so w duchu kooperacije lěta dołho z akterami serbskeje ciwilneje towaršnosće a zamołwitymi krajneje a zwjazkoweje politiskeje runiny na najwažnišej wužadani za přichod dorozumili: lěpsu podpěru čestnohamtskim při tworjenju regionalnych rěčnych rumow a skrućenje šěrokeho spektruma serbskosće jako jónkrótnosć Łužicy w dobje změny strukturow. Z dźensnišim rozsudom sakskeho statneho knježerstwa wostawa koalicija w Sakskej spušćomny partner serbskeho ludu. Zdobom so wšěm rjap skruća, kotřiž so za přichod Serbstwa angažuja. Dźakujemy so tohodla za přeswědčace wuznaće ministerki a tych, kotřiž su w tutym procesu sobu skutkowali, k wuznamej serbskeje rěče a kultury za identitu cyłeho kraja."

Zo móže Załožba za serbski lud ze zwyšenjom přiražkow planować, je wupłód njesprócniweho dźěła zamołwitych Zwjazka, Sakskeje a Braniborskeje kaž tež čłonow Parlamentariskeje přirady Załožby za serbski lud. Wosebity dźak płaći serbskimaj zapósłancomaj Sakskeho krajneho sejma Markej Šimanej a Alojsej Mikławškej.