Rada Załožby za serbski lud jo se zejšła stwórtk, 21.11.2024 w Lubinje (Błota).
W fokusu nazymskego pósejźenja jo stojał góspodaŕski plan za pśiduce lěto. Planowane wudawki laže zasej jasnje nad lětnymi pśipłaśonkami, kenž su w płaśecem financěrowańskem dogronje zapisane (Zwězk, Lichotny stat Sakska a Kraj Bramborska financěruju załožbu lětnje z 23,9 mio. EUR). Pówušenja wudankow nastawaju wósebnje dla nadpśerěznje wusokich tarifowych stopnjowanjow. Źěra we financěrowanju móžo Załožba w planje jano z tym kšyś, až rezerwu srědkow (4,9 mio. EUR), kótaruž su k wěstośe wót 2021 nagromaźili, dopołnje pśetrjeba. Wósebne wupominanje wiźi Załožbowa rada w tom, až budu se drje pśez śěže we wutwórjenju kněžaŕstwow w Sakskej a Bramborskej a krizu w Zwězkowem kněžaŕstwje, góspodaŕske kazni wšyknych tśich pjenjezedawarjow za lěto 2025 wó wjele pózdźej schwaliś, ako zwucone. Dokulaž pótakem njejo jasne, ga dostawa załožba swóje płaśenja (wótpłaśenja wótpadkow), nastaja se wóna na nachylne góspodarjenje až do srjejź lěta 2025. To groni, až njamóžo Załožba w toś tom casu nowe projekty a inwesticije pśizwóliś.

Pśiběrajucu starosć zwuraznja pśedsedaŕ Załožboweje rady Marko Kowar teke glědajucy na napněte financne połoženje pla wšych tśich pjenjezedawarjow: "Pjenjezedawarje su pód nawjedowanim Zwězka jadnanja wó Pětem financěrowańskem dogronje załožby zachopili, kótarež ma financěrowanje wót 2026 rědowaś. Tam jo bytostne, až se pśipłaśonki pówušuju, dokulaž su stupali powšykne płaśizny wót 2021 inflacije dla wó něźi 20 %. Jolic se njepśipłaśonki njepówušuju, deje se luźi pušćiś."
Jadnaś ma se rownocasnje teke wó zakokulenje 26 městnow, kótarež drje su mógali pśez pówušenje pódpěry wót 2021 zarědowaś, kótarež pak su tuchylu do kóńca 2025 wobgranicowane. Aby se wužytk a statkownosć toś tych městnow pógódnośiłej, jo zastojnstwo załožby w maju 2024 eksternu ewaluaciju do nadawka dał. Na zakłaźe wuslědkow toś teje studije, kótaraž jo se něnto Załožbowej raźe pśedpołožyła, maju serbske raźiśele toś te městna na zakłaźe spěchowańskich prioritow gódnośiś.
"Pjenjezedawarje su toś ten nadawk serbskim raźcam pśewóstajili, aby wopśimjeśowu awtonomiju Serbow pódšmarnuli. Až do nalětnego pósejźenja Załožboweje rady buźomy problematiku intensiwnje pśepowědaś a naźejamy se, až góźe se wšykne tuchylne městna dalej wjasć a až se mimo togo financěrowanje někotaregožkuli nowego městna, kótarež buźo wót lěta 2026 trjebne, raźijo.", groni załožbowy direktor Jan Budar.

W etaśe załožby jo se teke nowy projekt ze spěchowańskego programa "Serbska rěc a kultura w strukturnej změnje" za sakske projekty pśizwólił. How jadna se wó projekt zastojnstwowego zjadnośeństwa Slěpe "SorbIT! Serbska inowacija pśez tradiciju", kótaryž ma se w lětach 2025 do 2029 spěchowaś. Projekt ma rewitalizaciju, zachowanje a dalejwuwiśe serbskeje rěcy a kultury w zastojnskem zjadnośeństwje Slěpe pozitiwnje wobwliwowaś. Wobłuk projekta twóritej turistiske pógódnośenje regiona a serbska rěc a kultura ako znamje jadnoraznosći.
Drugi, za toś ten spěchowański program, zapódany projekt jo se nosarjeju projekta hyšći raz za wobźěłanje wrośił.

Dalšna tema pósejźenja jo było zawjeźenje tarifa w Ludowem nakładnistwje Domowina. K tomu jo informěrował direktor załožby Jan Budar: "Zawjeźenje TV-L jo wótzamknjone a slědk k 01.01.2024 realizěrowane. Z tym jo se pominanje dopołniło, kótarež jo nakładnistwo wót 1990tych lět sem pśecej zasej artikulěrowało a něnto skóńcnje rownopšawnosć tarifow w serbskich institucijach zarucujo."

Teke rozpšawa wó stawje twari "Forum serbskeje wědy pśi Lawskem arealu" jo tema na pósejźenju - planowańskich źěłow su derje póstupowali. Pśedplanowanje jo w dalokej měrje wótzamknjone, tak až móžo se wobšyrny plan rumow z diferencěrowanymi funkcionalnymi a techniskimi pominanjami we wobstojecem twaŕskem wobłuku zaměstniś. Na zakłaźe toś togo pśedplanowanja pśewjeźone kwalificěrowane pówoblicenje kostow pak pokazujo, až se w maju 2021 gropnje pówoblicona suma wó někotare miliony euro pśekšaca. Pśicyna su pśedewšym nadpśerěznje stupajuce twaŕske kosty. Pjerwjej až jo planowanje tak nadrobne, až twóri zakład za pśizwólenje strukturnych srědkow, muse zagronite něnto te wudawki, kótarež kosty signifikantnje wobwliwuju, identificěrowaś a wótpowědujuce alternatiwy namakaś.

slězynowa informacija
Załožbowa rada jo gremium Załožby za serbski lud a rozsuźujo we wšyknych wažnych nastupnosćach załožby. Wón wobstoj ze šesć rědnych zastupnikow serbskego luda, stawnje dweju rědneju cłonkowu pjenjezedawarjow a tśich rědnych cłonkow komunalneje rowniny ako teke jich zastupnikow.

protokol wobzamknjenjow (nimski)