Srjodu, 22.06.2022, jo se Zwězkowa góspodaŕska kazń 2022 w zwězkowem kaznjowem łopjenje wózjawiła a jo z tym pó pšawje płaśeca. Dla wólbow do Zwězkowego sejma nazymu 2021 jo se etat běžnego lěta akle 03.06.2022 wobzamknuł. Pó wobkšuśenju pśez Zwězkowu radu 10.06.2022 a pódpisanju pśez zwězkowego prezidenta 19.06.2022 nabydnjo etatowa kazń z wózjawjenim w zwězkowem kaznjowem łopjenje ako planowane slědk segajucy k 1. januaroju 2022 płaśiwosć.

Z płaśiwosću góspodaŕskeje kazni zakóńcyjo se tak pomjenjone nachylne góspodarjenje. Tak dłujko ako zwězkowy etat njejo hyšći wobzamknjony był, dowólijo artikel 111 Zakładneje kazni zwězkowemu kněžaŕstwoju, we wobgranicowanej wobměrje srědki wudawaś a kredity braś. To jo wósebnje w lětach pó wólbach Zwězkowego sejma nałog, dokulaž njamóžo nowy parlament etat južo w decembru pśed zachopjeńkom nowego etatowego lěta wobzamknuś.

Za załožbu su mimo pśipłaśonka wótpowědujucy 4. financěrowańskemu dogronoju (11.958,0 TEUR) teke pśidatne pjenjeze za konkretne projekty digitalizacije (195,0 TEUR), kótarež su južo 2021 etatizěrowali, znowa wobzamknuli. Z toś tymi pśidatnymi srědkami móžo se něnto wósebnje awtomatiske spóznawanje rěcy a mašinelne pśełožowanje dalej wuwijaś.

Co jo groniło nachylne góspodarjenje za załožbu? Wóna jo směła jano spěchowaś, za což wobstoj pšawniska winowatosć. To jo na pś. institucionelne spěchowanje serbskich institucijow abo spěchowanje dalejwjeźecych projektow. Z teje pśicyny njejsu se směli nowe projekty pśizwóliś a teke pśidatne srědki za napšawy strukturneje změny (§ 17 co. 31 InvKG) njejsu se mógali ako planowane k 01.01.2022, ale akle k 01.07.2022 wudawaś.