Java Script ist deaktiviert!

Damit die Seite mit vollem Funktionsumfang korrekt dargestellt werden kann, muss Java Script aktiviert sein.

Medijowe wózjawjenja (archiw)

 

Dowolnosć Zwjazka k dočasnemu zahajenju strukturnych projektow dóšła

Budyšin / Bautzen,

Załožba za serbski lud wobhospodari nimo regularneho spěchowanja z lětušeho tež srědki ze spěchowanskeho programa "Serbska rěč a kultura w strukturnej změnje" za projekty w Sakskej a Braniborskej. Dla nachwilneho hospodarjenja Zwjazka njebě dotal hišće jasne, hdy trěbne spěchowanske srědki k dispoziciji steja. Zarjad załožby wuchadźeše z toho, zo móža so projekty 1. julija 2022 zahajić.

Dźensa nětko wupraji Zwjazk dowolnosć dočasneho započatka, tak zo móža prěnje projekty wot nětka startować. W Braniborskej su to šěsć hižo kruće postajenych naprawow, w Sakskej pak móža so kóždolětnje próstwy za spěchowanje z tutoho programa stajić.

W swojim posedźenju 24. meje 2022 wobzamknje Załožbowa rada, lětsa tři za Saksku zapodatych naprawow spěchować. Hač do 30. septembra 2022 móža so pola załožby dalše próstwy wo spěchowanje naprawow, kiž maja so klětu započinać, stajić.

Pozadk: 2021 wobzamkny Zwjazkowy sejm w ramiku Zakonja za strukturnu změnu, zo je serbska rěč a kultura ze strukturnych srědkow spěchujomna. Srědki wotpowědnje § 17 čo. 31 InvestKG maja so přez Załožbu za serbski lud wobhospodarić. Za Łužiski rewěr w Sakskej steja hač do 2038 lětnje 2,5 mio. eurow k dispoziciji, w kraju Braniborska su hač do 2031 cyłkownje 19 mio. eurow etatizowanych.

Wot 1. julija powitamy w załožbowym zarjedźe w Budyšinje dwě nowej koleginje. Knjeni Bianka Kubašec budźe nas při wobdźěłanju spěchowanskich próstwow z programa strukturneje změny podpěrać a knjeni Diana Weclichowa přewza w spěchowanskim teamje nadawki koleginy, kiž je so na wuměnk podała.

Waša narěčenska partnerka k prašenjam strukturnych srědkow:

zastupjerka direktora / wotrjadnica Budyšin
Michaela Mošowa
tel.: 03591 550-320
moosche-stiftung@sorben.com