Dźěćace dźiwadłowe dny, wuhotowane wot RCW, załožby a NSLDź, wotměchu so lětsa hižo k 24. razej a to wot 11. do 12. meje w Budyskej młodowni a w Dźiwadle na hrodźe.

Na 50 dźěći ze Serbskeje zakładneje šule Ralbicy, Serbskeje wyšeje šule Radwor "Dr. Marja Grólmusec", Zakładneje šule "Handrij Zejler" Wojerecy a Žylowskeho Witaj-horta "Njewjerica" so na dźiwadłowych dnjach wobdźěli.

W srjedźišću stejachu zaso dźěłarnički, kotrež wěnowachu so wažnym ćežišćam dźiwadźelenja kaž improwizaciji a pohibowanju. Dźěłarnički nawjedowachu po dobrej tradiciji hrajerjo a režiserojo NSLDź kaž tež dalši fachowcy: Petra-Maria Wencelowa-Bulankec, Beata Nastickec, Katka Pöpelec, Torsten Schlosser a Jurij Šiman.

Štwórtk wječor předstaji Žylowski hort swoju aktualnu hru "Ptaškowa swajźba".

Na zakónčenju dnjow prezentowachu młodźi hrajerjo wurězki z dźěłarničkow. Wojerowscy šulerjo pokazachu swoju hru "Mały bojazliwc", kotruž předstajichu lětsa tež hižo na šulerskim swětowym dnju dźiwadła w Budyšinje.