Digitalne pórucenje za wuknjeje serbskeje rěcy kompletne

Pórucenje kursow na wuknjeńskej platformje Online serbski wuknuś (https://sprachkurs.sorbischlernen.de/#/welcome) wopśimjejo něnto teke kurse dolnoserbskeje rěcy na niwowach A1 - B1. Z tym póbitujo platforma cełkownje 10 kursow na 3 niwowach.

Nowe su konkretnje kurse za zachopjeńkarje z engelskim wujasnjenim a pśestajenim. Z tym su dolnoserbske kurse pśistupne teke za wuknjece z drugich źělow swěta, kótarež w kursu namakaju mjaz drugim teke wobšyrne gramatiske wujasnjenja w engelskej rěcy.

Wót měrca 2021 mógu pókšacane wužywarje rozšyjaś swóje znaśa z kursom Dolnoserbski B1. Pódla klasiskich temow ako drogowanje a (online-)nakupowanje se tematizěruju teke problemy a znjeglucenja pśi drogowanju, komunikacija na źěłowem městnje abo politiski angažement a pšašanja wěry.

We 8 tematiskich kapitlach namakaju wužywarje a wužywaŕki pśisamem 480 nadawkow a graśow, w kótarychž se zaběraju ze słowoskładom, rozmějucym słuchanim abo gramatiku. Wjele nadawkow ma někotare warianty (rundy). W "ekskursijach" zgóniju wuknjece wěcej wó serbskich stawiznach w Dolnej Łužycy a we swěśe, ale teke wó institucijach, towaristwach a wuměłcach a wuměłcowkach. W kursu njefeluju autentiske pśikłady za słuchanje a cytanje ako rozgrona, biografije wuměłcow a krotke tšojeńka.

Rowno tak ako w pśedchadajucych niwowach pśewóźujotej wužywarje a wužywaŕki comicowej ryśarja Jan a Marja. Wónej stej se dostałej do wuskosćow, gaž stej znaty zeger swětowego casa dokusow spórałej a z tym cas zastajiłej. W nejmudrem wózydle drogujotej ryśarja pśez cas a wšake źěle swěta, aby zeger reparěrowali - a pomagaju jima pśi tom znate a snaź mjenjej znate wósobiny a pioněry ze Serbow.

Pšawidłowne wuknjeje wordujo mytowane - ze spiwami, wideo, wurězkami ze słuchoknigłow a portretami wuměłcow.

Online serbski wuknuś - wobšyrny pool ressourcow

Online serbski wuknuś jo źe primarnje myslony za samostudium, wón pak wopśimjejo wjeliku kopicu ressourcow, kótarež mógu se wužywaś za cytańske a słuchańske nadawki we wucbje: dialog za blidom, typiske zdźělenja ze źiśownje, noticki na źěłowem městnje abo teke interviewy a spiwy. Za direktny pśistup k jadnotliwym wopśimjeśam ma kuždy SOL kurs wót měrca 2021 swój pśeglěd wopśimjeśow. Teksty, dialogi a nadawki móžoš how namakaś pó didaktiski relevantnych kriteriumach. Nic jano wucece, ale teke wuknjece mógu tak za wopśimjeśami pytaś, kótarež se zaběraju na pś. z konkretnjeu gramatiskeju formu.

Wót wózjawjenja prědnego kursa w lěśe 2017 (górnoserbski) respektiwnje 2018 (dolnoserbski) njejsu se jano dalšne niwowy pśinamakali. Wuwijaŕski team jo wugódnośił wužywaŕske reakcije a jo pytał kontakt k wužywarjam a wužywaŕkam, aby mógał pórucenje pśiměriś realnym pótrjebam. Tak su se w běgu casa wudopołnili dalšne zwucowanja a pomoc, respektiwnje pśestajenja.

W slědnej fazy projekta su awtorki a awtory kśěli pśespytaś, lěc se góźe teksty a materialije z online kursa teke za regularnu prezencnu wucbu. We zgromadnem źěle z lektorku górnoserbskich kursow na TU Drježdźany, Lubinu Hajduk-Veljkovićoweju, su nastali pśidatne źěłowe materialije, kótarež pógnuwaju k nałožowanjeju nowych znaśow w nowych kontekstach. Wóni wósebnje pódpěruju liche powědanje a pśedstajiju naraźenja za kooperatiwne online pisańske projekty. Take projekty su se wuspěšnje testowali zgromadnje z wuknjecymi w Praze a Lipsku. We zwisku z online wucbu pód wobstojnosćami zwězanymi z pandemiju su se materialije mógali slědkoju wuproběrowaś teke we wirtuelnej rědowni.

Pśidatne materialije, kótarež su pó źělach interaktiwne, góźe se licho a bźez pśizjawjenja dojśpiś na wuknjeńskej platformje TU Drježdźany. Pśistupowe daty mógu se pśipósłaś, eksportěrowanje modelowych kursow za druge wuknjeńske platformy jo tejerownosći móžne.

A kak źo dalej?

Projekt Online serbski wuknuś jo se w aprylu 2021 pśepodał Załožbje za serbski lud, kótaraž se stara wó wótwardowanje a techniske pśiměrjenja na razantne wuwiśe we wobłuku pórucenjow zeprětych na webowe wopśimjeśa.

Z pókšacujucym pówětšenim digitalneje datoweje baze za serbskej rěcy dajo wušej togo dalšne móžnosći, zwězaś pórucenje z drugimi póbitowanjami.

Chto stoj za projektom?

Projekt Online serbski wuknuś jo inicěrowała a spěchowała Załožba za serbski lud. Wótpowědne spěchowańske srědki dóstawa załožba z pśidatnych financielnych pódpěrow Zwězka, Lichotnego stata Sakska a kraja Bramborska za projekt "Serbska rěc w nowych elektroniskich medijach".

Za konceptom a wuwiśim stoj interdisciplinarny team didaktikarjow/-kow, awtorow/-kow, ilustratorow a softwarowych wuwijarjow, kótaryž jo koordiněrował multimedialny Centrum za wuknjenje rěcow TU Drježdźany. Jědro teama jo pódpěrała mań sobustatkujucych ako powědarje/-ki, zukowy mejstaŕ, testowarje/-ki, awtory/-ki a wuměłce/-owki, kótarež su sobu pregowali wjelerakosć pórucenja. Kompletnu lisćinu wšych wobźělonych namakajośo pód: sprachkurs.sorbischlernen.de → Wó programje.

Pśigranjańske partnarje:

Technische Universität Dresden
Lehrzentrum Sprachen und Kulturen
Karin Schöne, Ph.D.
koordinacija projekta
tel.: +49 351 463 32669
karin.schoene@tu-dresden.de

Załožba za serbski lud | Stiftung für das sorbische Volk
Katharina Čornakowa
tel.: +49 3591 550310
Cornak-Stiftung@sorben.com

SOL Medijowa informacija (PDF)