Java Script ist deaktiviert!

Damit die Seite mit vollem Funktionsumfang korrekt dargestellt werden kann, muss Java Script aktiviert sein.

Medijowe wózjawjenja

 

Za serbsku widejowu hru wjace hač 10.000 downloadow zličili

Budyšyn,

Kompjuterowu hru "Krabat a potajnstwo serbskeho krala", kotraž je wot 2018 online přistupna, su sej zajimcy po wšěm swěće wjace hač 10.000 króć pola Apple, Google a Microsoft downloadowali. Tuta dyrdomdejska serbska hra, kotraž ma tež němsku a jendźelsku wersiju, ma swojich kupcow samo w USA, Brazilskej, Israelu, Južnej Africe, na Filipinach a we Vietnamje. Jörg Hübner, nawoda skupiny RAPAKI, kotraž je hru wuwiła: "Smy naš zaměr docpěli a tež w mjezynarodnym publikumje zbudźili zajim za serbsku rěč, kulturu a za našu Łužicu z jeje (!) wobkuzłacym swětom mytow. To widźimy na downloadach a kupcach po wšěm swěće kaž tež na kopicy pozitiwnych wothłosow wužiwarjow."

Pozadki hry a jeje wuwića:

"Krabat a potajnstwo serbskeho krala" je projektna skupina RAPAKI w nadawku Załožby za serbski lud wuwiła. Nadawk, produkować serbsku hru za kompjuter, je wobstatk ofensiwy załožby, serbšćinu na šěrokim polu tak mjenowanych nowych medijow prezentnišu sčinić. Hra wotkrywa wužiwarjej na digitalne wašnje Łužicu w zažnym 18. lětstotku a bě prěni raz za PC Windows w lěće 2015 wušła. W aprylu 2018 přiměri ju skupina aktualnym systemam, wosebje za smartfon a tablet kaž tež za Windows 10. W awgusće 2019 bu hra z wersiju w jendźelšćinje wudospołnjena. Z tym je "Krabat a potajnstwo serbskeho krala" prěnja serbska kompjuterowa hra za mobilne digitalne nastroje kaž tež prěnja w jendźelšćinje.

Rjek tuteje stawizny je Krabat ze serbskeje powěsće, kotryž bu mjez druhim přez literarne adapcije Jurja Brězana a Otfrieda Preußlera w Němskej a druhdźe na swěće znaty. Zakładny koncept hry so na to měri, zo móže wužiwar - nimo dyrdomdejskeje zabawy - hrajkajo serbšćinu wuknyć a sej našu kulturu wotkrywać. Přetož fiktiwne jednanje wopřija tójšto kulturno- a regionalnohistoriskich aspektow a hraje na wšelakich městnach w Hornjej a Delnjej Łužicy, mjez druhim w Budyšinje a w Błótach.

"Krabat a potajnstwo serbskeho krala" móžeš bjezpłatnje za iPhone a iPad, pola Google Play a w Microsoft Store za Windows 10 downloadować. Za hraće kompletneje hry wšak dyrbi sej wužiwar, prěni kapitl hry wuspěšnje dokónčiwši, in-app kupić, kotraž płaći w kóždej platformje 5,99 €.

dalše informacije: www.rapaki.de

kontakt za medije:
Załožba za serbski lud
Hanka Budarjowa, h.buder-stiftung@sorben.com, tel.: 03591 550 330

RAPAKI:
Jörg Hübner, joerg@rapaki.de, Tel.: 0178 356 376 5